Ngā pūkenga, ngā mōhiotanga me ngā wheako

He ara pai te whakaaro ki ō pūkenga, ki ō mōhiotanga me ō wheako hei whakatau i ngā momo mahi ka pai, ka ngahau hoki ki a koe:

kia ohia manomanotia ō pūkenga, ō mōhiotanga me ō wheako ki te taha o tō whānau me ō hoa. Whakaarohia ngā mahi ka pai ki a koe me ngā pūkenga e hāngai ana – ko te toi pea, ko te hākinakina pea, ko te whakairo pea, ko te taka hāngī pea, ko te tunu parāoa pea.
pānuitia ētahi whakatairanga tūranga, ētahi rārangi mahi rānei ka porohitahia ai ngā pūkenga, ngā mōhiotanga me ngā wheako e rārangi mai ana. Me ngana hoki koe ki te whakahāngai i ngā pūkenga ki ētahi mahi kua mahi kētia e koe, hei tauira, kua whai pūkenga pāhekoheko au i te mahi i te hokomaha.

Kei te pae tukutuku hoki o Careers NZ tētahi rauemi pai hei āwhina i a koe ki te whakatau i ō pūkenga, me tētahi taputapu mō te whakahāngai i ō pūkenga ki ngā tūranga rerekē.

E whakahirahira ana hoki ki te whakaaro ki ō kaingākautanga me ō pīrangi! Tirohia ngā tūranga e hāngai ana ki ō kaingākautanga me ō pīrangi ka whakaarohia ai ngā pūkenga, ngā mōhiotanga me ngā wheako ka kawea e koe ki aua tūranga.

Ngā pūkenga whakawhiwhi mahi

Ko ngā pūkenga whakawhiwhi mahi ngā pūkenga e pīrangitia ana e ngā kaiwhakawhiwhi mahi i te wā o te tono kaimahi. E rite tonu ana te kitea o aua pūkenga i ngā whakatairanga mahi, ka mutu, e whai ake nei ēnei:

Te waiaro pai
Te whakawhiti kōrero
Te whakahaere-whaiaro
Ngā pūkenga whakaaro
Te mahi ngātahi
Te hiahia ki te ako
Te manawaroa

Ka taea te ako ēnei pūkenga i roto i ō mahi akoako, i tō hapori, i roto rānei i āu anō mahi. Hei tauira,

mā te hono atu ki tētahi kapa hākinakina, kapa haka rānei e whakapakaritia ai tō mahi ngātahi.
mā te waihanga me te whai i tētahi mahere akoako e whakapakaritia ai tō whakahaere-whaiaro.
mā te kitekite i ngā hoa me te tūtaki atu ki ētahi tāngata hou e whakapakaritia ai tō whakawhiti kōrero me tō manawaroa.
mā te whai i ētahi mahi whai wheako, i roto rānei i te hapori e āwhinaita ai tō tātai pūmanawa, ka mutu, he tino tīmatanga mēnā kāore i pērā rawa te nui o ō tūranga ā mohoa noa nei.

He hōtaka kua waihangahia e pai ai tā ngā rangatahi whai pūkenga, pērā i ngā Tohu Whakanui o te Duke of Edinburgh.

He nui ngā kiriata kei te hōngere TiriAta a Careers NZ e whakaatu ana i ngā tūranga rerekē me ngā pūkenga me whai mō aua tūranga.

Ētahi atu pūkenga me ngā mōhiotanga e whaihua ana

Tērā hoki ētahi atu pūkenga whānui, ētahi atu mōhiotanga whānui hoki e kimihia ana e ngā kaiwhakawhiwhi mahi maha. Mā konei e kaha ake ai te tūponotanga ka whai mahi koe i ngā ahumoni rerekē.

He maha ngā tūranga e whaihua ai te pai o te mōhio ki te mahi rorohiko. Ki te pīrangi koe ki te whakapakari i ō pūkenga rorohiko, he nui ngā akoranga utu kore i te nuinga o ngā hapori. Rapuhia te “computer skills courses” e kitea ai ngā hōtaka kei tō rohe.

E whakahirahira ana te pānui, te tuhituhi me ngā pūkenga matua o te pāngarau mō te nuinga o ngā tūranga. Mā konei e mārama ai koe ki ngā waeture o te hauora me te haumaru, ki ngā kirimana mahi, ki ētahi atu tuhinga anō hoki ka kitea pea ka mahi ana koe. Kei te pae tukutuku o CareersNZ ētahi pārongo whaihua mō te rapu āwhina ki te whakapakari i ō pūkenga.

Tērā tonu e uaratia e te kaiwhakawhiwhi mahi te mōhio o ana kaimahi ki ngā reo me ngā ahurea rerekē, mātua rā i ngā tūranga e mahi tahi ai rātou ki ngā momo tāngata huhua.

I Aotearoa, e whaihua ana tō mōhio ki ngā āhuatanga matua o te reo Māori, o ngā tikanga, o te ao Māori hoki. He nui ngā rauemi pai mō te ako i te reo Māori me ngā tikanga pērā i ngā taupānga o Āke Āke me Kupu, i Te Aka Māori Dictionary, i a Whakaata Māori hoki.

Te hautū waka

Ka whakatuwhera tō whai raihana here i ngā kūaha ki ngā tūranga maha i Aotearoa, tae atu ki ngā tūranga e kore nā koe e hautū waka. He pārongo atu anō mō te whai i te raihana hautū waka ki Drive.govt.nz.

He āwhina hoki i ngā whakahaere i te hapori, i ngā kura, i ngā iwi anō hoki e whai raihana ai koe, nā reira e whaihua ana te kimi i ngā tautoko kei tō rohe. He pai hoki te kimi i ngā whakahaere i tō rohe i te pae tukutuku o Youth Service | Ratonga Taiohi, toro atu ki Ngā Pou Whakawhirinaki o Aotearoa i tō rohe hei āwhina i a koe ki te kimi i tētahi whakahaere, pātaitia rānei tō kura, whakapā atu rānei ki tō iwi.

E whakahirahira ana hoki kia haumaru te hautū waka. Ka pā kino ngā hāmenetanga hautū waka ki tō rapu tūranga, ki tō pupuri ki tō tūranga, ki tō wātea hoki ki te hāereere.

He pārongo atu anō mō te noho haumaru ki ngā rori kei te pae tukutuku o SADD/Kaitiaki o Ara.

Tērā ētahi tūranga me mātua whai tiwhikete whakaora ohotata, ka mutu, e uaratia ana e ētahi kaiwhakawhiwhi mahi te kaitono kua whakapau kaha ki te whai i tētahi.

Whakatū ai ngā rōpū ohaoha, pērā i a Hato Hone, i a Rīpeka Whero Aotearoa hoki i ngā akoranga puta i te motu, ka mutu, tērā tonu e āhei atu te tangata ki ngā whakangungu whakaora ohotata i tōna whare mātauranga, i tōna wāhi mahi rānei.

Ko tēhea tūranga?

Nā, kua whakaarohia ō pūkenga, ō mōhiotanga me ō wheako, me whai whakaaro koe iāianā ki te momo tūranga e tika ana ki a koe.

Ko ētahi o ngā mea hei whakaarotanga māu:

Te wāhi me te āhua o te mahi.
Ō kaingākautanga me ō pīrangi.
Te āhua o tō mahi ngātahi.
Ngā hāora e pīrangi ana koe ki te mahi.
Te āhua o te tautoko a tō mahi i tō whānau me ōna painga ki tō whānau.
Ngā momo wero e pīrangi nā koe i roto i ō mahi.

Ka whakatauria ana e koe te ara kura tuarua hei tūhuratanga māu, he tīmatanga pai pea a Careers New Zealand. Ka whakaaturia ki te kiriata o raro iho nei ngā kōwhiringa ringarehe e wātea ana. .

Te kapetuhi ataata available for Ngā Akoranga me ngā Whakangungutanga Ringarehe: kei a koe te whakatau Huaki

Kati

Ngā Akoranga me ngā Whakangungutanga Ringarehe: kei a koe te whakatau

Te kaiwhakataki: Ka kōwhiri ana koe i te mahi hei tūranga mōu, he take nui te āhua. Me takatū koe ki ngā mea katoa. Me whai ara ringarehe koe.

Te kaimahi ahumāra: I kōwhiri au ki te uru atu.

Te kaimahi hiko 1: I kōwhiri au kia pūmau te mōhio e whai hiko ana tātou. . .

Te kaimahi hiko 2: . . . ki ngā wāhi katoa e whai take ana!

Te pia wai tūmatanui: I kōwhiri au kia whai pūtea, i a au e ako ana.

Te pāpā o Nikita: I te kōrerotanga mai a Nikita i tōna pīrangi kia tū hei kaimahi kōrere wai, i kōwhiri au ki te kī atu . . . ka wani kē.

Nikita: Pōuri atu, Pāpā.

Te kaiwhakahaere hanganui: I kōwhiri au ki te whakamarumaru i te tangata . . . hei whakamarumarutanga hoki mōku.

Te kaipūkaha waka kōpiko o Bluebridge: I kōwhiri au ki te whai wāhi atu ki te rūma pūkaha o Aotearoa . . . ki tētahi rūma pūkaha motuhenga.

Te kaimahi ponana hiko: I kōwhiri au ki te whai ara pai ake hei hanga mea.

Te kaipāmu me tana kurī ponana hiko: E whakatinanatia ai te anamata. . . i te inamata.

Te kaiwhakatika waka: I kōwhiri au kia whai mahi pia tēnā, me tēnā, me tēnā.

Te kaiwhakataki: Nā reira kōwhiria ngā pūkenga mō tētahi ao, kāore nei e mutu te hurihuri. Kōwhiria he mahi ka rawe ki a koe i ia rā. Nā runga i ngā akoranga me ngā whakangungutanga ringarehe, kei a koe te kōwhiringa.

Ngā pūkenga, ngā mōhiotanga me ngā wheako

Ngā pūkenga whakawhiwhi mahi

Ētahi atu pūkenga me ngā mōhiotanga e whaihua ana

Te hautū waka

Ko tēhea tūranga?

Next in Te whiwhi mahi

Te tono tūranga

Ngā mōtika me ngā haepapa i te wāhi mahi