Getting a job
Te whiwhi mahi

Te mōhio he aha ō pūkenga me ngā mea e tūmanakohia ana mōu i roto i te wāhi mahi.

Ahakoa kei te whakaaroaro koe ki tētahi mahi ake, tō ara mahi wā roa rānei, te mōhio he aha ngā mea e kimihia ana e tētahi kaituku mahi, ā, me pēhea te takatū mō tētahi uiui ngā mea hira e riro mai ai te tūranga e hiahia ana koe.

Te kapetuhi ataata available for Te whiwhi mahi Huaki Kati
E rangona ana ngā puoro whakaohooho puta noa.

Kei te kāmera: Kitea ana te tungāne e āhua māharahara ana, e noho ana ki tōna moenga me te ngana ki te tuhituhi i tāna Tātai Pūmanawa ki tāna rorohiko pōnaho.

Te tungāne: Kāti rā, Tātai Pūmanawa. Me pēhea taku tuhi i tētahi Tātai Pūmanawa?

Kei te kāmera: Kitea ana te tuahine e pātōtō ana i te kūaha. Ka kuhu atu ia ki te rūma moe, ka noho ki te tūru i te taha o te tēpu.

Te tuahine: Ei, i kī mai a māmā kei te kimi tonu koe i tētahi mahi. Kei te hiahia āwhina?

Kei te kāmera: Kitea ana te tungāne e tā ana te ihu i te whai āwhina.

Te tungāne: Āna, koa.

Kei te kāmera: Kitea ana te tuahine e whakamārama ana i ngā hātepe matua o te whai i te mahi tuatahi

Te tuahine: Ka pai. Kāti rā, he hanga nui te whai i tō mahi tuatahi, engari kei te rite ake koe i tāu e mahara nei. Me tīmata mā te whai whakaaro he aha tāu e hiahia ana hei mahi. He aha ngā mahi e pārekareka ana ki a koe? Kaua e kī mai ko te moe. Me tika mai.

Kei te kāmera: Kitea ana te tungāne e whai whakaaro ana ki ngā kōrero a te tuahine nōna ka ara ake i te moenga, ka tū ki mua i te whakaataata.

Te tungāne: Pēhea te mahi manaaki?

Kei te kāmera: Kitea ana te tuahine e menemene ana me te whakapakē i ōna matimati, ka puta tūmatarau te tungāne hei kaimahi kīhini e mau ana i te taupaki me te tītaora. Ka ohorere ia, kātahi ka whiu i te tītaora ki tōna pokohiwi.

Kei te kāmera: Kitea ana te tuahine e whakapakē ana anō i ōna matimati.

Te tuahine: Ka kuhu atu rānei ki tētahi mahi ringarehe.

Kei te kāmera: Kitea ana te tungāne ka puta tūmatarau hei kaimahi ringarehe, e mau ana i te kahutumu muramura me te pupuri i te tūwiri. Ka ohorere ia, ka whakakā i te tūwiri, kātahi ka tuku atu i tētahi anō whakaaro.

Te tungāne: Ka mahi pea au ki te pāmu. Ki te ngahere rānei.
Kei te kāmera: Kitea ana te tuahine e menemene ana, e whakapakē ana i ōna matimati, kātahi ka puta tūmatarau te tungāne e mau ana i te kākahu swanndri.

Te tuahine: Nē?

Kei te kāmera: Kitea ana te tuahine e whakapakē ana i ōna matimati, kātahi ka puta tūmatarau te tungāne e mau ana i ōna kākahu o mua.

Te tuahine: Hei muri mai, whakarārangitia ngā pūmanawa e pai ana koe. Me rau atu ko ō pūmanawa whai mahi, hei āwhina kia whai i te mahi e hiahia ana koe.

Kei te kāmera: Kitea ana te tuahine e whakamārama ana i te hiranga o ngā pūkenga whai mahi, ka hoki te tungāne ki tōna moenga, ka noho. Kei te rangirua tōna āhua.

Te tungāne: Pūmanawa whai mahi?

Kei te kāmera: Kitea ana te tuahine e whakamārama ana he aha ngā pūkenga whai mahi, ka puta hoki ngā tauira e whitu ki te mata kei ōna tahataha ki te reo Pākehā me te reo Māori | Te waia | Te whitiwhiti kōrero, | Te whakahaere-whaiaro | Ngā pūkenga whakairo | Te mahi ngātahi | Te hiahia ki te ako | Te manawaroa.

Te tuahine: Āna, ka taea ngā momo pūmanawa nei te whakawhanake ki te kāinga, ki tō tātau hapori, i a koe e ako ana rānei.

Kei te kāmera: Kitea ana te tungāne e kōrero ana ki ōna hoa kei tētahi pāka Kei te harikoa tōna āhua.

Te tuahine: Ko te noho tahi me te tūtaki ki ngā tāngata hou, koia tētahi huarahi ki te whakapiki i ō pūmanawa whakawhiti kōrero.

Kei te kāmera: Kitea ana te tungāne e noho ana ki tōna tēpu e mau ana i ngā pokitaringa, e whakamahi ana i tāna rorohiko me te puka tuhi ki te whakarite i te mahere ako.

Te tuahine: Ko te whakarite me te whai i te mahere ako, koia ka whakapiki i ō pūmanawa whakahaere whaiaro, whai whakaaro hoki.

Kei te kāmera: Kitea ana te tungāne e noho ana ki tōna moenga me te hīkaka o te āhua nōna ka whakamarohi i te mahi tūao.

Te tungāne: Pēhea te mahi tūao?

Kei te kāmera: Kitea ana te tuahine e kaha whakaae ana ki tā te tungāne i marohi ai.

Te tuahine: Āe, te pai hoki!

Kei te kāmera: Kitea ana te tungāne e kohikohi rāpahi ana ki tātahi me ētahi atu tāngata tokowhā. Kei te kōrerorero rātau, kei te whakangahau.

Te tuahine: Ko te mahi tūao, te kohikohi pūtea rānei, koia ka tohu i te wairua matangareka me mahi tahi ki te kapa.

Kei te kāmera: Kitea ana te tuahine e whakamārama ana ki te tungāne he aha ngā hātepe e whāia ai te mahi. Kei te noho te tungāne ki tōna moenga, kātahi ka kite i a ia e āta titiro ana ki te mata o tāna rorohiko.

Te tuahine: Kāti, ka hiahia koe ki te āta tirotiro i ngā pae ipurangi whai mahi me te tono i te mahi e hāngai ana ki ō hiahia me ō pūmanawa.

Kei te kāmera: Kitea ana te tuahine e whakamārama ana he aha ngā kōrero me rau atu ki te Tātai Pūmanawa me te tungāne e noho ana ki tōna tēpu e upa ana ki te pai o tāna i mahi ai.

Te tuahine: Whakaritea tō Tātai Pūmanawa mā te rau atu i ngā pūmanawa, akoranga, wheako hoki e hāngai ana.

Kei te kāmera: Kitea ana te tuahine me te tungāne e kōrero ana mō ngā uiuinga mahi.

Te tungāne: Me ngā uiuinga?

Te tuahine: Mmm - Ā - me whakarite i a koe anō mō te uiuinga. Āe, me whakaharatau.

Kei te kāmera: Kitea ana te tungāne e whakaharatau ana i te uiuinga mahi me tētahi whanaunga pakeke. Kātahi ia ka puta ki tōna rūma moe e whakaotioti ana i te kōrero ki te tuahine.

Te tungāne: Ā tēnā. Te pai hoki.

Te tuahine: Ka pai.
.

Kei te kāmera: Kitea ana te tuahine ka tū ake i te tūru, ka tū ki te kūaha o te rūma moe e tuwhera ana. Kei te tau te āhua o te tungāne, kei te whai whakaaro, ka rotarota te tuahine ki te whakarāpopoto i ngā kōrero matua.

Te tuahine: Me maumahara, he rerekē te āhua o te huarahi o ia tangata. Kimihia he aha tāu e manawareka ana, tirohia he aha kei te ao, whakawhanaketia ngā pūmanawa whai mahi. Me tīmata mā te whakapaipai i tō moenga.

Kei te kāmera: Kitea ana te tungāne ka whai whakaaro, ka pūtohe nōna ka whakapaipai tere i tōna moenga, ka noho ki tōna tēpu, ka tīmata te āta patopato ki tāna rorohiko. “Toroa ngā huarahi”, “Whakatipuria ō pūmanawa mahi”, me “Whakamaua tērā mahi” ka puta ki te mata. Ka mutu te ataata me te hononga ki te pae ipurangi o Te Kete mō ngā Tamariki Wehe i te Kura.