Te tono tūranga

I ngā wā katoa, kia māmā te wāhi ki te kaiwhakawhiwhi mahi mā te whakangāwari i tō tātai pūmanawa, kia māmā hoki te pānui. Ka pēnei mā te:

• whakamahi i ngā tongi matā hei whakarārangi i ō pārongo.
• ariari o te wehewehenga o ngā wāhanga.
• noho o tō tātai pūmanawa ki ngā whārangi e rua.
• poto o ngā rerenga kōrero.
• whai i tētahi tātauira māmā kāore e pīroiroi ana.
• whakapango me te whakaariari i te momo tuhi, pērā i te Arial, i te Calibri rānei
• tāpiri i ō taipitopito whakapā ki te upoko o te whārangi.

Ka uaua pea te tuhi mō ō pūkenga, ō mōhiotanga me ō wheako, engari kei rite koe ki te kūmara. Kei te pīrangi ngā kaiwhakawhiwhi mahi ki te kite i tō tika mō te tūranga. Whakaarohia ētahi atu wāhi ōkawa e whakataki ai koe i a koe anō – pērā i te marae, i te akomanga rānei – ka mutu, kia whakawhānuitia tēnei. Ki te rangirua koe, me tono āwhina koe i tō whānau, i ō hoa, i tētahi kaiārahi ara mahi rānei mō te ara pai katoa e whakaaturia ai ō pūkenga.

He kupu āwhina mō te tuhi e pā ana ki ō pūkenga kei te pae tukutuku o Careers NZ.

Ahakoa pēhea, me mātua whakahāngai tō tātai pūmanawa ki te tūranga e tonoa ana e koe. Tirohia ngā momo tātai pūmanawa rerekē kei Careers NZ. Ka taea hoki e koe te whakarite e koe tāu ake tāhuhu tangata mā tā rātau utauta CV Builder, te whakamahi rānei i ētahi atu rauemi tāhuhu tangata tuihono pērā i tātauira tāhuhu tangata Canva.

Ahakoa ko te kōrero ki ngā tāngata e mōhio nā koe e mahi ana i te kamupene, ahakoa rānei ko te pānui mō te kamupene i te ipurangi, mā te rangahau e māia ake ai koe i roto i tō uiui. Ka hiamo ngā kaiwhakawhiwhi mahi i te kitenga o ō mahi rangahau. Mā konei hoki koe e mōhio ai mēnā kei te pīrangi rawa koe ki te tūranga.

E māori noa ana te āmaimai, te wareware rānei ki ētahi o ō kōrero i roto i te uiui. Koia e pai nei te mōhio ki ngā mea matua hei kōrerotanga māu ki te kaiwhakawhiwhi mahi. Ka kapi i te nuinga o ngā uiui:

• tō tātai pūmanawa, nā reira me waia koe ki te whakamārama i ō pūkenga me ō wheako.
• te rārangi mahi me ngā pātai e pā ana ki tō tika mō te tūranga.
• ngā pūkenga hangarau me whai pea e koe mō te tūranga.
• ō pātai ki te kaiwhakawhiwhi mahi; i konei ka whaihua ō mahi rangahau.

ngā whakautu ki ngā pātai e auau ana te puta i ngā uiui

• He mea nui tō āhua i te tūtakihanga atu, nā reira me mātua mau kākahu tika mō te uiui. Mēnā he wero ki a koe te kimi kākahu mō te uiui, tērā ētahi whakahaere, pērā i a Dress for Success, ka āwhina i a koe.
• E whakahirahira ana te reo ā-tinana, nā reira me pīkari te whakarongo, me aro, me hāngai hoki te titiro ki te tangata. Kia huatau, kia whakaute hoki koe i te roanga ake o te tukanga.
• Mēnā mā te ipurangi tō uiui, me mātua tika tō kāmera me te oro, me noho ki tētahi wāhi ngū, me kaha hoki tō hononga ki te ipurangi.

Kia mahara ake, he wā hoki te uiui kia kite atu koe i te tika o te tūranga ki a koe. Pātaitia ngā pātai, ka mutu, kia āta whai whakaaro koe i mua i tō whakatau.