Te Tūhononga Mahi #TeTerengaAkoranga - Ngā Momo Uiui
Te Kaiwhakataki: [Yvette Harry-Wright, Career Development Consultant]:
Kia ora koutou. Nau mai ki te Terenga Akoranga a Tūhononga Mahi mō ngā momo uiui.
He mahi whakarikarika te uiui, engari ka paku weriweri hoki pea te āhua. Nā reira, e karohia ai ngā āhuatanga ohorere, he mea nui te pātai atu ki te kaiuiui e mōhiotia ai te momo o te uiui. Pātaitia e mōhiotia ai te hunga ka tae atu, rangahaua rātou, whakaritea hoki mō tō uiui.
He nui ngā momo uiui, ā, ki konei whakamāramatia ai ngā āhuatanga matua o tēnā momo, o tēnā momo.
Tuatahi ake, anei ētahi tīwhiri mō ngā mahi me mahi e koe i ngā momo uiui katoa:
Rangahaua te kamupene me te kaiuiui.
Whakaritea ētahi pātai hei tuku māu.
Whakaharatautia ngā whakautu ki ngā pātai uiui e rite tonu ana te rangona.
Tō whakaatu i a koe anō; te tōtika o te noho, te mārama me te pōturi o te kōrero, te menemene hoki.
[He Uiuinga ā-Waea]
Ki ngā uiuinga ā-waea tātari tuatahitia ai te tangata. E whakahirahira ana kia tika ō mahi, inā hoki ko tō eke ki te wāhanga o muri mai, kei te āhua o tēnei wāhanga.
Anei ētahi tīwhiri e puta ai tō ihu. Mō ngā uiuinga kua whakaritea, me whakarite ānō nei he uiuinga ā-tinana, ā, me whakarite he wāhi e ngū ana.
Te kaiwhakahaere HR: Kia ora, Donna, ko Rebecca taku ingoa, ā, ko au te kaiwhakahaere HR mō Tempo Ltd, kei te pēhea koe i te rangi nei?
Whakamahia te ingoa o te kaiuiui i te tīmatanga me te mutunga o te kōrero.
Te kaitono mahi: Tēnā koe i tō waea mai, Rebecca, he koanga ngākau te rongo kōrero i a koe. E nui ana taku pīrangi ki te tūranga kei a koutou.
Āta whakarongo, kaua hoki e haukoti i ngā kōrero a te kaiuiui ka kōrero ana ia.
Te kaiwhakahaere HR: Tuatahi ake, i pīrangi au ki te tuku pārongo ki a koe mō te mahi e mōhio ai ki te tika o tēnei mahi ki a koe. E rapu ana mātou i tētahi tangata hei...
Me ngākaupai te whakatepenga. Mihia te tangata mōna i waea atu, ā, me whakamōhio atu ki a ia ki tō pīrangi ki te tūranga.
Te kaitono mahi: Tēnā koe, Rebecca, kāore i a au ētahi atu pātai i tēnei wā, engari e nui ana taku pīrangi ki te tūranga kei a koutou.
Ka waeahia pea koe e te kaiwhakawhiwhi mahi, e tētahi kaikimi kaimahi rānei, me te kore e whakamōhio atu ki a koe i te tuatahi ā muri ake i tō tono mahi. Ki te pēnei, ā, kāore hoki koe i tētahi wāhi pai ki te kōrero, tonoa kia whakaritea he wā pai.
[He Uiuinga Ōpaki]
Ka hāneanea te āhua o tēnei momo uiuinga, nā reira ka pōhēhē pea te tangata he hui noa. Engari kia mataara. Kei te aromatawai te kaiuiui i a koe i te roanga o te hui.
Kāore e pērā ana i ngā uiuinga ōkawa, arā, he raupapa me whai, engari kāore i te pērā ngā uiuinga ōpaki i ngā kāuta. Heoi, e ōrite tonu ana te whāinga; he whakatau i tō tika, i tō kore rānei e tika, mō te kamupene.
[He Uiuinga ā-Hopukanga Whakaahua]
I tēnei momo uiuinga, me whakaahua koe i a koe anō ki tētahi kiriata. Tērā pea me whakaahua koe i ētahi whakautu ki ētahi pātai whāiti, me whakaahua rānei i a koe e kōrero ana mōu anō me ō pūkenga.
Me ōkawa ō kākahu, ānō nei he uiuinga ā-tinana.
Whakamātauria te hangarau e whakamahia ana e koe, hihiratia hoki te kaha o te hiko me te pai o ngā rama i te whakaahua, whakangūhia ō pūrere katoa, me mātua noho hoki tō kanohi me ō pokowhiwhi ki te hopukanga.
Kia noho tū koe, kia hāngai hoki tō titiro ki te kāmera ka kōrero ana koe.
Hihiratia te wāhi o te kāmera i tō pūrere, kei tiro noatia tōna mata.
Whakaarohia ō kōrero i mua i te hopukanga. Tuhia ka haratau ai.
[He Aromatawai ā-Ipurangi]
He hanumitanga tēnei momo uiuinga i ngā mahi aromatawai. Ka inea ō pūkenga e kitea ai tō tika mō te tūranga. Ka whai wāhi pea ki tēnei, ko:
Ngā aromatawai mātai hinengaro
Ngā whakaaturanga,
Ngā ngohe pea me ngā tohutohu.
[He Uiuinga ā-Rōpū]
He momo uiuinga tēnei e tātari ai i tētahi puna kaitono ā mua i ngā uiuinga takitahi.
I te nuinga o te wā, ka whai wāhi ki tēnei ngā mahi whakaoti rapanga ā-rōpū, pērā i te mahi ā-rōpū, i te whai wāhitanga, i te ārahi, i te whakawhiti kōrero, i te mahi tahi anō hoki.
Anei ētahi tīwhiri e puta ai tō ihu:
Me whai wāhi koe ki ngā whakawhitinga kōrero.
Me pīkari te whakarongo.
Me mihi ngā whakaaro o te katoa.
Me tuku ōu anō whakaaro.
Kei te pīrangi pārongo atu anō koe mō te Tūhononga Mahi? Whāia mātou i te Pukamata, i facebook.com/workconnectnz, peka atu rānei ki tā mātou pae tukutuku, ki careers.govt.nz/work-connect.
