Te tuakiri me te ahurea

Ko te tuakiri ā-ira, ko tā te tangata titiro ki tōna āhua ā-ira. He rite, he rerekē rānei i tērā i te wā i tautuhia ai i tōna whānautanga mai. Ehara i te mea mā ngā wāhanga o te tinana, mā te momo kākahu, mā te whanonga rānei e tautohu te ira o te tangata.

Ko tō tuakiri ā-ira, māu anake e tautohu. Ko tōu ake titiro, kāore i tētahi atu te manature ki te uta i ō rātou whakaaro ake ki runga ki a koe.

Ko ēnei ētahi o ngā tautohunga tuakiri ā-ira:

• Irakē: ko te tangata e whakarere ana i te ira weherua o te tāne, o te wahine.
• Irarere: ko te tangata kāore nei e pūmau ōna whakaaro ki tētahi tuakiri ā-ira.
• Irapūmau: ko te tangata e rite nei tōna tuakiri ā-ira ki tērā i kopoua ai i tōna whānautanga.
• Irawhiti: ko te tangata e rerekē nei tōna tuakiri ā-ira i tērā i tuhia ai i tōna whānautanga.
• Takatāpui: he kupu Māori hei whakahiapo i ngā aronga hōkaka kanorau, i ngā tuakiri ā-ira, i ngā whakapuakitanga ā-ira, i ngā āhua ā-ira anō hoki.

Ko te aronga hōkaka o te tangata e hāngai ana ki te whakamaneatanga o tētahi ki tētahi. Tērā, he ōkiko, he rongo whakaingoingo, he kare ā-roto, he taihema rānei. Ehara i te mea, he kōwhiringa tēnei nā te tangata, engari kē, he āhuatanga ake nō te tangata. Ki te uruhina kia panoni tēnei āhuatanga, tērā, ka wharate tangata. Kaua hoki mā te tuakiri ā-ira o te tangata e tatū ai tōna aronga hōkaka.

Arā hoki pea ētahi tapanga kua tūpono kētia  e koe, pēnei i te taearo, i te takatāpui, i te taerarua, i te taerakore, i te taerarau hoki.

He mea nui kia mōhio tātou ko te ira me te hōkakatanga, kīhai i toka, ā, kei tēnā, kei tēnā te tikanga mō te roa ōna e kimi ana i tōna tuakiri. Kaua e whakawākia te tangata mō te wā e pīrangi ai ia ki te whakaputa i a ia anō: ehara i te mea kotahi tonu te ara tika hei whai.

Ki te whāki te tangata i tōna tuakiri ā-ira ki a koe, ka whakamōhio rānei ki a koe i ētahi panonitanga, atawhaitia ia. He māia ia. Kia tika tō whakamahi i te karangatanga tika mō runga i a ia, ā, me whakapāha ki te hē i a koe. Kei te takahi kōrua i te huarahi kotahi.

Ahakoa te whanaketanga i Aotearoa nei, ka nui tonu te rangona o te aukati, o te hahani, o te auhi e ō tātou hapori āniwaniwa. He mea nui kia mōhio e ngau tonu ana te whakatoihara i ētahi tāngata tokomaha, ā, kua heke tonu aua pānga ki ēnei wā nei.

Mēnā e hia āwhina ana koe, tētahi rānei e mōhio nei koe, arā ētahi ratonga tautoko e wātea ana:

• InsideOut – ka mahi tahi ki ngā kura, ki ngā wāhi mahi me te hapori, e haumaru ai te noho a ō tātou hapori āniwaniwa.
• I’m Local – ka tuku rauemi utukore, me tētahi mahere o ngā rōpū tautoko mō te hunga takatāpui, mō te hunga irahuhua i Aotearoa.
• OutLine – ka tuku ratonga tautoko aropā, utukore, ā, e tata nei te 40 tau e haere ana.
• Gender Minorities Aotearoa – e whakahaerehia ana e te hunga irawhiti mā te hunga irawhiti, ā, kei a rātou ētahi hononga ki ētahi momo tautoko huhua puta i te motu.
• Takatāpui.nz – ka tuku rauemi mā te hunga takatāpui me ō rātou whānau.
• Be There – he pūtahi pārongo nā te Youth Sector Rainbow Collective.
• Rainbow Youth – ka tuku tautoko, pārongo, taunaki hoki mā ngā taiohi irakē, irahuhua, takatāpui, taihemarua hoki.

Ka kitea nuitia te kanorau o tō tātou taupori i ngā tāone matua. Nō te tatauranga ā-motu 2018, neke atu i te hauwhā o te taupori i whānau i tāwāhi, engari ka kīia ko Aotearoa tō rātou kāinga.

Kātahi anō a Aotearoa ka takahi i te huarahi kia whanake te manarite mātāwaka, ā, me whai wāhi tātou katoa. Māu anō e whiriwhiri he pēhea tō whai wāhi, arā, mā: te ako, te tautoko pakihi, te whai wāhi tika atu ki ngā kaupapa here ki ngā wāhi e taea ana, te tūao rānei. Kei Te Tari Mātāwaka ētahi pārongo, rauemi hoki mō ngā hapori mātāwaka puta noa i Aotearoa. Arā hoki ngā whakahaere pērā i te Ripeka Whero Aotearoa me ā rātou hōtaka motuhake mā ngā tūao hei āwhina i ngā konene.

He kōrero anō mō te hītori o te manarite-kore i Te Ara: The Encyclopedia of New Zealand.

Kua kitea rā e tātou te whakakino o te kaikiri i ngā tau tata tonu nei, ā, nō tātou katoa te haepapa ki te turaki i te kaikiri, ahakoa te manawarau o ētahi ki te kōrero mōna.

Me ka taea e koe i roto i te marutau, whakapātaritaritia. Whākina, tāpaea rānei he nawe ōkawa. Whakapā atu ki te Pirihimana ki te pā te mōrearea ki tētahi. I ētahi wā, ko te kitea ā-kanohi o te tautoko i tētahi pārurenga, e kitea ai he aha ngā whanonga kāore nei i te tika. Kei ngā whārangi tukutuku e whai nei ētahi kōrero āwhina i a koe:

• The Human Rights Commission mō te urupare i te kaikiri
• AllySkills NZ mō te turaki i te kaikiri i ia rā
• The National Action Plan Against Racism
• Community Law – he aratohu mō te whakahāwea me te ture

He maha ngā kura, me ngā wāhi mahi, he kaupapa here ōkawa ō rātou mō te aukati i te whakahāwea. Anei ētahi atu rauemi, ratonga whaihua:

• Te Kāhui Tika Tangata – he kohinga pārongo mō ō mōtika manature ā-tangata nei i Aotearoa.
• Belong Aotearoa – he pūtahi panoni hapori monihua-kore kei Tāmaki, e anganui ana ki ngā taupā toronaha mō te tangata kātahi anō ka tau ki tēnei whenua.
• Inclusive Aotearoa – he mahi kia tutuki te kauawhi pāpori, he tuku rauemi, he tūhono i te tangata ki ngā whakahaere e hiahia ana ki te whai wāhi atu ki ngā āhuatanga panoni.
• Kei te paetukutuku o te Papawhenua o Te Tiriti o Waitangi ngā rauemi mō Te Tiriti o Waitangi.
• Youth Law – he tuku āwhina utukore mō te ture mā te hunga rangatahi puta noa i Aotearoa.
• Community Law – he whakahaere i ētahi Taiwhanga Ture Hapori puta kau i te motu, ā, ka tuku āwhina utukore e pā ana ki te ture.