Ngā hononga tāngata

Ngā hononga tāngata hauora

Ahakoa ko ngā hoa, ko te whānau, ko ngā hononga whakaingoingo, taihema rānei, kia mārama koe ki ngā āhuatanga e kīia ai he hauora ō hononga tāngata. Ka mutu, me whakapau ngoi te katoa e whai pānga ana ki aua hononga.

Mā ngā hononga hauora e haumaru ai, e hāneanea ai, e uaratia ai, e whakautetia ai koe. Anei ētahi āhuatanga e hauora ai te hononga tāngata, ko:

te whitiwhiti kōrero i runga i te whai hua me te whakaute
te mārama ki tā kōrua, koutou rānei e kawatau ana i te hononga
te mōhio ki ō mōtika, ō haepapa hoki
te manarite me te rite o te toha o te mana
te mōhio ki ngā tuakoi ā-tinana, ā-kare ā-roto hoki o tēnā, o tēnā
te whakaute i ngā uara, i ngā kare ā-roto, i ngā whakapono hoki o tēnā, o tēnā

Whakaarotia ngā hononga o tō ao ā mohoa noa nei. Ko ngā hononga hauora, ngā hononga e ora ake ai, e iti iho ai tō mokemoke. Whakaarotia ngā pūmanawa e paingia ana e koe i ētahi tāngata, ā, kia pērā hoki koe ki ētahi atu.

Te renarena o te taukaea ki tō whānau

Tērā ka matemate ā-one koe mehemea e noho matara ana koe i tō whānau mō te wā tuatahi. Ko te utu pea o te takahi whenua e taupā nei i te riterite o tō toro i a rātou.

Ko te mokemoke ki tō whānau, ki tō kāinga hoki he māori noa, ka mutu, arā ētahi āhuatanga e renarena tonu ai te taukaea, e kore ai te ongeonge e pā ki a koe. Whakamātauria ētahi mahi, pēnei i:

te whakarite i tētahi taiwhanga kōrero ā-rōpū me tō whānau. Ka whakatau ki te arowhai i a koutou anō, i ia rua rā, i tētahi wā i te wiki, i te wā rānei e pai ana ki a koe. He tuku kau pea i tētahi whakaahua hangareka, i tētahi paku karere ā-reo rānei.
te whakarite mahere ki te hui ā-ipurangi mō ētahi kaupapa motuhake, ki te kore e taea te noho rae ki te rae.

Mehemea e māharahara ana koe ki ētahi o tō whānau e māuiui ana, e kaumātua ana, whakaritea pea he tautoko i te hunga e noho pātata ana ki a rātou, pēnei i te kiritata, i tētahi hoa, i tētahi kē rānei o te whānau. Whakapā atu pea ki tētahi kaiwhakarato hauora, e mauru ai ō māharahara.

Ngā hoa pirihonga

Ko tētahi o ngā āhuatanga nui ka kitea pea e koe i tō oranga, ko te rerekē haere o te āhua o ō piringa ki ō hoa, me te auau o tō koutou kite i a koutou.

Ka pupū ake ētahi kare ā-roto taitini ka mutu ana te kura. He māori noa te māharahara ki tēnei āhuatanga, ki tō kore mōhio rānei he aha kei tua. He mea nui te noho tūhono tonu ki ō hoa i harakoa ai koe kia kitekite rangi atu, rangi mai. Heoi anō, me mārama hoki ka rerekē haere ētahi āhuatanga ka takahi ana te tangata i huarahi kē.

Ka warea tonu te tangata ki te ara hou e takahi rā ia, nō reira, he pai kia mārama (me te kore e whakamau) ka kore ana tētahi e whakahoki i ō pātuhi, e wātea rānei ki te noho tahi ki a koe! Whakaritea he wātaka kia kitekite putuputu ai koutou i a koutou, kia mataara rānei ki ngā taiopenga, ki ngā mahi rānei hei whai mā koutou.

Ehara i te mea, he māmā te whai hoa hou ki te katoa, engari, nō tātou katoa te hiahia kia noho huānga, noho tūhononoho, ahakoa te ahurea, te tuakiri, mehemea rānei he tangata whakakumu, he tangata māhorahora rānei.

Ka wehe koe i te kura, ka ako koe ki ētahi huarahi rerekē ki te tūtakitaki tāngata. Ka pakeke haere ana koe, ko ētahi wāhi e tūtakitaki tāngata hou ai koe, ko roto mai i ō mahi ngahau, i tō wāhi mahi, i te hāhi, i ngā rōpū hapori rānei. Ki te hiahia koe kia riterite ake ō noho ki ētahi atu, whāia ētahi ngohe, whakapiri atu rānei ki ētahi karapu e āki ake ana i ngā hononga pāpori. E taea ai, me mātātoa kē ētahi o tātou.

Ngā hononga whakaingoingo, taupiri hoki

Tokomaha ana ka tūhura i ngā hononga whakaingoingo, taupiri hoki ka pakeke haere ana te tangata. He mea nui kia kaua e whāwhai, kia haumaru, kia mārama hoki he rerekē tā tēnā, tā tēnā e pīrangi ai.

Tokomaha ana ngā tāngata ka tūtakitaki mā te ipurangi, nō rātou ka aruaru i ētahi hononga whakaingoingo, taihema rānei. Ki te whiriwhiri koe kia pēnei, arā ētahi huarahi hei maru i a koe:

Ka tūtakitaki ā-kanohi nei koe ki tētahi tautangata, whakamōhio atu ki tētahi e whakaponotia ana e koe, kei hea ake rā koe.
Kia tūtaki ki tētahi wāhi tūmatanui, mēnā ko te tūtakinga tuatahi tēnā ki tētahi.
Me whai mahere mehemea he tangata whakaweti, whakamanioro, mōrearea rānei te tangata hou nei. Whāki atu ki tētahi e mahi ana i taua wāhi.
Kaua e tuku pārongo whaiaro mōu kia mōhio rawa koe ki te tautangata.
Kia mataara ki ngā kaitāware, kaiuruhi hoki.
Kaua e tukutuku whakaahua kirikau ōu, mehemea kāore i te pai ki a koe.
Kaua e tukutuku whakaahua kirikau o ētahi atu, ki te kore rātou e whakaae mārire atu.

He kaha te pēhanga aropā i te ipurangi. Kaua e whakaaro, e noho haepapa ana koe ki tētahi atu, ki te tuku whakamārama, ata whakamōrea, pārongo rānei. Kei Netsafe hoki ētahi rauemi mō te noho haumaru i te ipurangi.

He māori noa ki te tokomaha te kai karihika, te te hiahia mōhio noa rānei ki ngā tini āhua o te ai. Me kaua e whakawākia e tātou. Ka mātaki ētahi i te karihika kia nanawe ai te taihema, ki te kohi whakaaro, pārongo rānei mō te ai.

Heoi anō, me mōhio hoki koe ki ngā ripa o te karihika. Kaua e whakamahia hei aratohu mō ngā hononga tūturu, haumaru, hauora hoki.

Arā hoki ētahi pānga rerekē o te karihika – kei te āhua anō o te tangata, o ōna wheako, o tōna tupunga ake. Kia maumahara ki tēnei, ka tuku hanga koe ki tētahi me te kore i mātua whakaaetia e ia, ki te kore rānei koe e āta mōhio ki a ia. Tērā pea, ka manawa kawa, manawarau, mōrihariha, kohuki rānei a ia.

Ki te pīrangi āwhina koe ki te ārahi take e hāngai ana ki te karihika, me tōna pānga ki a koe me ō piringa, tirohia te Light Project. Kei te New Zealand Classification Office hoki ētahi pārongo, rangahau hoki mō te karihika me ōna pānga.

Me kaua tētahi e ākina ki te mahi i tētahi mahi kāore i te pīrangitia. Ko te whakaaetanga, he mahi kia tupu te whakapono me te whakaute mō te mahi ai.

I Aotearoa, me 16 rawa te pakeke ka whakaaetia ai te ai i raro i te manature. Me kī, me 16 rawa kōrua ko tō hoa, ka mutu, me mārama te whakaaetanga, i mua i te whiriwhiri kia ai kōrua.
Kāore koe e āhei ki te tuku whakaaetanga i a koe e haurangi ana, e hurori ana, e moe ana rānei.
Ki te ākina, ki te whakawetitia koe, kāore koe i te whakaae. Tae atu ana ki ētahi pēhanga ā-tinana, ā-kare ā-roto hoki.
Me tino tautuhi koe he aha tāu e whakaae nei: ehara i te mea ko te ai ngoto anake, engari, ko ērā atu mahi hōkaka, pēnei i te whakaahuatia ōu.

Ko te whakaaetanga, ehara i te hanga rehurehu: ko te whakaatu i ētahi tohu o te whakaae, kāore i te rite ki te āta tuku whakaaetanga. Mehemea kua pāwheratia, kua taitōkaitia rānei koe, tētahi rānei e mōhiotia ana e koe, me mātua mōhio koe, ehara i a koe te hē, ā, me haere ki te kimi tautoko.

Ahakoa te wā i mahia ai, me whakamōhio atu i te tūāhua ki te Pirihimana mā te waea atu ki 111.
Mā te Pirihimana hoki koe e tohutohu me aha koe – kei te āhua tonu o te wā i mahia ai.
Mehemea e pā ana te pōkaikaha ki a koe, ki tētahi atu rānei, ā, e kaha raru ana koe/ia, he mea nui te kimi ngaio hauora.
Kei ACC ētahi tautoko utukore mō ngā tūora taitōkai, māna, mā tō tākuta koe e tono.
Whakapā atu ki Safe to Talk ki te kore koe e rite ki te kite i tētahi kaihaumanu.
Whakapā atu ki Youth Law ki te pīrangi āwhina manature koe.

He akoranga anō mō tēnei mea te whakaaetanga kei te paetukutuku a New Zealand Police.

Ngā hononga tāngata