Kua kōrerohia i tēnei whārangi:

He aha ngā pūkenga whai mahi?

Koinei ngā pūkenga kua tautohua e ngā kaiwhakawhiwhi mahi hei pūkenga nui mō ngā tāngata e whai mahi ana. Koinei ngā pūkenga e kitea nuitia ana i ngā whakatairanga mahi mō te whānuitanga o ngā momo tūranga mahi.

E whitu ngā pūkenga o te 'whai mahi'. Anei aua mea:

  • waiaro pai
  • whakawhitiwhiti
  • whakahaere whaiaro
  • ngā pūkenga whakaaro
  • mahi tahi
  • hiahia ki te ako
  • manawaroa.

He mea nui ēnei pūkenga e whitu ki ngā kaiwhakawhiwhi mahi nā te mea, mehemea he pūkenga pēnei ōu ka nui te ako a ngā kaiwhakawhiwhi mahi mōu. Ehara i te mea mā ngā kōrero o tō tāhuhu tangata anake e whakatau ai mēnā rānei ka whiwhi mahi koe engari, mā tō āhei hoki ki te whakaatu hoki i ngā pūkenga tika ōu.

Mō te whakamāoritanga, pāwhiri ki konei.

Ka taea ēnei mea katoa te ako mā te mahi i ngā mahi kaua i te kura anake engari i waho anō. Hei tauira, mā te tākaro mō tō tīma whutupōro ka āwhina kia pai ake ō pūkenga mahi tahi, te whakauru rānei ki tētahi akomanga hei ako i tētahi reo ka āwhina i tō hihiri ki te ako.

Ehara i te mea me whai koe i ēnei mea katoa kia whiwhi mahi ai, engari ka āwhina ēnei ki te whakaatu ki tō kaituku mahi tō hua ki tana pakihi.

Ngā hono whaitake:

Ētahi atu pūkenga taketake

Ehara ko ngā pūkenga whai mahi anake, ahakoa he mea nui, e kimihia ana e ngā kaituku mahi. E ai ki te mahi, ka hiahia pea rātau i ētahi atu pūkenga, hāngai ake. Hei tauira, ka hiahia tētahi wharekai ki te tiki i tētahi tangata whai pūmanawa mō te tunu kai hei kaitunu, ka mutu he matatau ki te haumaru kai.

Heoi, kei reira anō ētahi pūkenga taketake e kimihia ana e ngā kaituku mahi. Anei aua mea:

Ngā pūkenga whakamahi rorohiko

Ko te nuinga o ngā mahi e hiahia ana kia mōhio koe ki te whakamahi rorohiko. Tēnā pea ko te tuku īmēra noa iho, te patopato mauhanga, te whakamahi ripanga rānei ngā mahi e hiahiatia ana, kei te āhua tonu o te mahi. Otirā, mō ētahi atu mahi, e tika ana kia matatau te tangata ki ngā mahi pērā i te whakawhanake whārangi paetukutuku me te whakahaere kaupapa whakatairanga. Mehemea kāore anō koe kia ako i te mahi rorohiko i tō kura, he akoranga rorohiko kei te nuinga o ngā hapori. Rapua "ngā akoranga pūkenga rorohiko" kia kite ai he aha kei tō rohe.  

Ngā pūkenga reo matatini me te pāngarau

He mea nui te pānui, te tuhituhi, me te pāngarau waiwai i te nuinga o ngā wāhi mahi mā reira koe e mārama ai ki ngā tikanga hauora me te haumaru, ngā kirimana mahi, me ētahi atu mauhanga ka tūponotia e koe i a koe e mahi ana. Kei te paetukutuku CareersNZ ētahi kōrero hei āwhina i a koe ki te whakapakari i ōu pūkenga.

He raihana hautū waka

He tino pūkenga te whai raihana rāhui e whai mahi ai te tangata i Aotearoa ­­– ahakoa ehara pea te hautū waka i tētahi āhuatanga e hāngai pū ana ki te tū mahi.

E toru ngā taumata o te tukanga raihana hautū waka i Aotearoa (arā, ko te Raihana Ākonga, Raihana Rāhui me te Raihana Matua) –  ka eke te tangata ki te 16 tau te pakeke ka āhei te tīmata.  

Tirohia te paetukutuku Te Waka Kotahi NZ Transport Agency mō ētahi atu kōrero e pā ana ki ngā taumata raihana, ā, kia whai āwhina hoki ki te ako i ngā pūkenga ariā me ngā pūkenga whakamahi e whiwhi raihana ai koe. Koinei te paetukutuku ōkawa o Te Waka Kotahi (NZTA) i hangaia ai mō te hunga rangatahi.     

He Tohu Whakaora Whāwhai o nāianei


I ētahi mahi me mātua whai koe i te Tohu Whakaora Whāwhai o nāianei, ā, ka rata ētahi kaiwhakawhiwhi mahi ki ngā kaitono mahi kua ngana ki te whai i tēnei tohu. Ka whakaratoa e ētahi kura, e ētahi ratonga whakangungu, e ētahi kaiwhakawhiwhi mahi rānei kia mahia ngā akoranga Tohu Whakaora Whāwhai mō te kore utu, mō te utu iti rānei hei wāhanga o ā rātou hōtaka whakangungu. Mehemea me whai Tohu Whakaora Whāwhai koe mō tētahi mahi, he maha ngā ratonga puta noa i te motu kua whakaaetia e NZQA. Rapua ngā akoranga i tō rohe mā te ipurangi, heoi anō, e whakarato hoki ana ngā kaupapa atawhai pērā i St John’s Ambulance me Rīpeka Whero Aotearoa i ngā akoranga puta noa i te motu.      

Me pēhea au e mōhio ai ki ōku pūkenga?

E ai ki ō kaingākau me ō wheako, he rerekē pea ō pūkenga ki ō ētahi atu tāngata. Mā te mōhio ko ēhea ō pūkenga kei a koe ka āwhina i a koe ki te whiriwhiri i ngā huarahi ara mahi, ka mutu he mea nui anō ki te whakarata i ngā kaituku mahi me te whiwhi mahi.

Mō ētahi atu mōhiohio mō tēnei, me ētahi atu momo pūkenga ka whai kiko i te wāhi mahi, tirohia tā mātau tuhipānui mō ō pūkenga me ngā kaha mā te pāwhiri i te hono i raro.

Ngā hono whaitake:

He mōhiohio ō Careers.govt.nz mō ngā mea katoa mai i te tono mō ngā karahipi ki te tuhi Tāhuhu Tangata, e āwhina ana i a koe ki te whiriwhiri he aha te ara mahi tika mōu.

Ngā paetukutuku hira

  • Careers.govt.nz: He mōhiohio ō Careers.govt.nz mō ngā mea katoa mai i te tono i ngā karahipi ki te tuhi Tāhuhu Tangata, e āwhina ana i a koe ki te whiriwhiri he aha te ara mahi tika mōu.