Kua kōrerohia i tēnei whārangi:

He aha ngā kōwhiringa matua?

Ehara i te mea ko te mātauranga matua, te whai mātauranga atu anō rānei i te haere noa ki te whare wānanga, kuratini rānei. Kua kapi ko ngā mātauranga katoa i muri i te kura, ahakoa ko te ako, akoranga pia, ahumahi rānei.

Ehara i te mea he "pai ake" tētahi o ngā kōwhiringa i tētahi atu, ā, ko tāu ka whai me hāngai ki te mahi me ngā wheako e hiahia ana koe.

Ngā hono hei āwhina i a koe ki te kōwhiri:

He aha te momo mahi e hiahia ana koe?

Ahakoa ehara koinei anake te pūtake, he maha ngā tāngata ka whai i te mātauranga atu anō hei āwhina ki te whai mahi whakamere. Ko te mea tuatahi i ngā wā katoa ko te whakaaroaro mō te momo ara mahi, wheako hoki e rapua ana e koe i a koe e tuku whakatau mō te whakapakari i ō pūkenga.

Mēnā kāore koe i te tino mōhio mō te momo ara mahi e hāngai pai ana ki a koe, pānuitia tā mātau pōhi mō tēnei kaupapa:

Mēnā kei te mōhio koe, he maha ngā utauta hei āwhina i a koe kia mōhio ai koe he aha ngā momo akoranga me whai koe.

Pēnei i ēnei:

Me kōrero anō koe ki te hunga e mōhio ana koe kei te whai i tētahi mahi e rite ana ki tērā e hiahia ana koe ki te whai mōhiohio atu anō. Ka taea pea e rātau koe te āwhina ki te whiriwhiri he aha ngā mea e hiahiatia ana mō ngā kōwhiringa ara mahi rerekē. Ka taea anō e koe te haere ki te wāhanga ara maha o ngā paetukutuku kamupene i roto i te wāhi kei te hiahia koe ki te whakauru atu.

He aha atu anō ngā mea ka hiahia koe mai i tō whai mātauranga atu anō?

He maha ngā painga o te whai mātauranga atu anō, i tua atu i te āwhina i a koe ki te whai mahi. He mea nui kia taurite tō wā ina whakaaroaro koe mō te pai rawa mōu.

Hei tauira, ka hiahia pea koe kia:

  • whai wheako ki te ao ākonga
  • ako i ētahi pūkenga hōu
  • noho ki tētahi wāhi rerekē
  • mōhio mēnā kei te hāngai ki a koe ētahi wāhi mahi
  • me pārekareka noa ki tētahi marau e pai ana ki a koe.

Ka hiahia anō pea koe ki te whai whakaaro ki ngā hapori me ngā rōpū hei whakauru atu pea māu ki roto i a koe e whai ana i te mātauranga matua. Hei tauira, he mea nui pea ki a koe tētahi rōpū ākonga Māori mōu, kei te rapu rānei koe i tētahi ratonga tautoko tauwhāiti. Ahakoa he aha, me oti i a koe tō rangahau i mua i tō whakatau whakamutunga.

Tētahi kupu ārahi: Mēnā ko tō whakatau kia tīmata koe ki te whai i tētahi akoranga mātauranga matua, ā, kua tau i a koe te wāhi ako, me whaihanga koe i te raumati i a koe e tatari ana ki te tīmata. Ko te whai mahi, te pānui pukapuka rānei mō ō akoranga rānei tētahi āhuatanga pai mō te anga whakamua.

Kia āhua mōhio ai koe he pēhea te āhua o te noho hei ākonga, tirohia te ataata a Careers.govt.nz i raro.

Te ao o te ākonga i Aotearoa

Ko te mātauranga matua te tino huarahi mōu?

Nā, kua whai wāhi koe i te whakaaroaro haere anō mō te whai i te huarahi ako, he whai wāhitanga pai ki te tirotiro mēnā koinei te whakaritenga tika. Ki te whakatau koe, kei te hiahia kē koe ki te whai i tētahi atu huarahi, kei te pai tērā. Ehara i te mea he pārekareka, ka whiwhi hua rānei te katoa i te whai mātauranga atu anō, ā, me whai hua tēnā mōu.

Ka hiahia kē ētahi ki te whai mahi, te whakatā mō te kotahi tau rānei i mua i te whakaaroaro mō te akoranga. Kia maumahara, ka taea e koe te whai mātauranga ā tōna wā. Ka tino angitu ngā ākonga pakeke i te nuinga o te wā, i muri i te whai i ētahi atu mahi me ngā wheako oranga, ā, ka whakarite koinei te wā ki te whai tohu. Ka taea anō e ngā ākonga pakeke te haere ki te whare wānanga, kuratini mā te whakamahi i ngā wheako oranga (kaua ko ngā otinga mātauranga anake) hei tautoko i te tono.

Kei reira anō te huarahi ki te whakairi i ō akoranga mēnā ka tīmata koe me te huri i ō whakaaro. Ahakoa kāore e pēnei ia akoranga, ehara i te mea me oti katoa i te wā kotahi mō te maha o ēnei.

He pērā hoki mō ngā whakangungu, mēnā ka kite koe kāore i te tika mōu, ehara i te mea me whai tonu koe.

Me kōrero ki ngā tāngata kei roto i ngā momo mahi rerekē ka rangahau ai, kei kitea kāore pea koe e mate ki te whai i te mātauranga matua.

Ngā paetukutuku hira

  • Careers.govt.nz: He mōhiohio ō Careers.govt.nz mō ngā mea katoa mai i te tono i ngā karahipi ki te tuhi tāhuhu tangata, e āwhina ana i a koe ki te whiriwhiri he aha te ara mahi tika mōu.
  • No Major Drama: He paetukutuku e tuku ana i tētahi rārangi o ngā kaupapa rerekē, ā, ka kitea e koe he aha ngā akoranga e tukuna ana e ngā Whare Wānanga. He whakaatu ki a koe he aha ngā ara mahi hei whai i te otinga o tētahi akoranga ake.
  • NZQA: E tiaki ana a NZQA, te Mana Tohu Mātauranga o Aotearoa rānei i ō tātau tohu me te whakahaere i ngā aromatawai i roto i ngā kura.
  • Hoto Akoranga: E tuku ana a StudyLink i ngā mōhiohio maha mō te ako - e hia te utu, me pēhea te utu, ā, me pēhea te tono.
  • Te Amorangi Mātauranga Matua: Ko Te Amorangi Mātauranga Matua te hono i waenga i te Kāwanatanga me te mātauranga matua. Ahakoa kāore i te hāngai pū ki ngā ākonga, he paetukutuku pai mō te hunga kei te rapu i ngā kōrero hou rawa me ngā rauemi hei āwhina mō te mātauranga matua.