Ngā mōtika me ngā haepapa i te wāhi mahi

E uaratia ana e ngā kaiwhakawhiwhi mahi tō tae atu, tō whakatutuki hoki i ō mahi i te wā e tika ana. Mēnā e rangirua ana koe ki tō wā tīmatanga me te wā e tika ana kia whakatutukina ngā mahi, kōrero atu ki tō tumu, ki tō kaiwhakahaere rānei. Ko tō whakahaere tika i te wā he whakaatu i tō whakaute i te wā o ō hoa mahi, i tō noho hoki hei hoa mahi tika.

“Ka hoatu ana tō tumu i ētahi mahi ki a koe, pātaitia atu ngā wāhanga o te mahi me mātua whakaoti. Mēnā he maha ngā mahi, tonoa kia whakaraupapahia ngā mahi, ka pēnā ai tō whakatutuki haere.”

- Cyntia

Ahakoa tō tūranga, tō tīma rānei, ka kite koe i te tāera mahi rerekē o ō hoa mahi. Kia mākohakoha tō kuhu. He wheako ako ngā tūranga katoa, ka mutu, he akoranga pea kei roto i tō mōhio ki ngā āhuatanga o te tangata ka pai tō mahi tahi ki a ia mō ō mahi ā haere ake nei.

Ko te mōhio ki ngā ahurea rerekē i roto i te wāhi mahi tētahi āwhina e whaihua ake ai tō whakawhiti kōrero ki ō hoa mahi, tō whakawhanaungatanga, te āhua hoki o te wāhi mahi. Ka piki tō mōhiotanga ā-ahurea mā te āta whai wā kia mārama haere ki ngā ahurea rerekē me ngā ara e kaha ake ai tō whakaute atu ki ngā tāngata nō aua ahurea.

I Aotearoa, e whakahirahira ana kia mārama koe ki ngā tikanga Māori. Ka kaha ake tō mōhio ki ngā tikanga mā te kōrero ki tō whānau me ō hoa e mōhio ana, mā te pānui hoki i ētahi o ngā pukapuka pai, mā te tiro hoki i ngā rauemi matihiko, mā te uru rānei ki tētahi akoranga.

E tika ana kia huatau, kia whakaute hoki te āhua o ō īmēra mahi. He āwhina nui te mihi, te whakamahi i ngā ingoa, te poroaki hoki e tika ana mō te whakakaha i te whanaungatanga.

E rerekē ana ngā kawatau mō ngā kākahu i ngā wāhi mahi rerekē. Ki te rangirua koe, me pātai atu ki tō tumu hou i mua i te tīmata ki tētahi tūranga hou. He whakaaro pai kia āhua tōtika tonu, kia ōkawa rānei ō kākahu tae atu ki te wā kua mōhio koe ki te āhua e tika ana ki a koe.

Ko te tūāpapa o tētahi tūranga pai ko tētahi kirimana tika. I tōna tikanga, kua tukua tētahi ki a koe i mua i tō tīmata ki te mahi, ka mutu, me mātua waitohu e koe, e tō kaiwhakawhiwhi mahi anō hoki. He tohu whakaohiti mēnā kāore tō kaiwhakawhiwhi mahi e hoatu ana i tētahi kirimana, e whakahou ana rānei i taua kirimana nā runga i ngā panonitanga ki tō mahi.

Ā-ture nei, e mana ai te kirimana, me mātua whai i ngā mea e whai ake nei:

• tō ingoa
• te ingoa o tō kaiwhakawhiwhi mahi
• te wāhitau o tō mahi
• te momo tūranga (he ukiuki, mō tētahi wā kua oti te tohu, he waimori rānei)
• ō haepapa
• te utu (tae atu ki te utu tiringa, te utu nā runga i te whakatutukina o tētahi wāhanga mahi, me ētahi atu)
• ngā hāora mahi
• mēnā he wā whakamātau i te mahi
• he kōrero mō te whai i tō utu me te haurua ina mahi koe i ngā rā whakatā ā-ture
• ngā ara whakatau raru.

Me mātua mōhio koe kua hoatu e tō kaiwhakawhiwhi mahi ngā pārongo mō te nui me te auau o te utua ōu: i te nuinga o te wā, ka utua i ia wiki, i ia rua wiki, i ia marama rānei. Hihiratia tō puka utu e mōhio ai koe e tika ana te nui o te utu.

Ko te utu ā-hāora mōkito te utu iti katoa e whakaaetia ana e te ture kia utua e te kaiwhakawhiwhi mahi ki te tangata. Mēnā 16 tō pakeke, kei kō atu rānei, me mātua utu koe ki tēnei utu; māna, kei tētahi reiti tīmatanga, reiti whakangungu rānei koe. He pārongo anō mō te utu ā-hāora mōkito me tōna nui i te wā nei kei te pae tukutuku a Employment New Zealand.

He maha ngā momo whakamatuatanga e wātea ana ki a koe. Ko ētahi, ko ngā rā whakatā ​​ā-ture, ko te whakamatuatanga ā-tau, mō te māuiui rānei, tangihanga rānei.

He here kei ngā momo whakamatuatanga rerekē. Hei tauira, me mahi koe ki te taha o te kaiwhakawhiwhi mahi kotahi mō te 12 marama e whā wiki ai te tapeke o ngā rā whakatā ā-tau ka wātea ki a koe. He pārongo atu anō mō ō mōtika mō ngā whakamatuatanga kei te pae tukutuku a Employment New Zealand.

He hauātanga tō tētahi o ia tokorima kei te pakeketanga e mahi ai te tangata i Aotearoa. He hauātanga ā-tinana pea, ā-whakaaro rānei, ā-hinengaro rānei. Ehara i te mea ka taea te kite ngā hauātanga katoa. He rauemi mā ngā kaiwhakawhiwhi mahi me ngā kairapu mahi hauā kei te pae tukutuku a Employment New Zealand.

He rauemi hāngai pū ki te hunga hauā i te pae tukutuku a Firstport. Tuku ai a Te Hiringa Tangata i Job support hei āwhina i tā te hunga hauā utu i ngā panonitanga ki te wāhi mahi me ētahi taputapu.

Mēnā e mahi tahi ana koe me tētahi tangata hauā, tērā ētahi mea hei maharatanga māu. He kōrero āwhina, he rauemi hoki kei te pae tukutuku a te Office of Disability Issues.

He haepapa kei runga i tō kaiwhakawhiwhi mahi mō tō ora me tō haumarutanga. Nā runga i tēnei, me:

• tika te whakangungua ōu kia whakamahia e koe ngā hangarau whāiti
• mārama koe ki ngā tūraru me ngā mōreareatanga e hāngai ana
• hoatu ngā taputapu ki a koe, ngā whakangungutanga hoki e ārahi ai koe i ngā tūraru me ngā mōreareatanga
• rite tonu te whakangungua ōu ki te ārahi i ngā tūraru me ngā mōreareatanga
• wātea koe ki te kōrero i ō māharahara mō te oranga me te haumarutanga ki tō kaiwhakawhiwhi mahi.

Ko te whakatā me te whai wā kai hoki tētahi o ō mōtika. He pārongo atu anō kei te pae tukutuku a Employment New Zealand.

Nōu te haepapa mō tōu anō oranga me te haumarutanga, tae atu ki tērā o te hunga kei tō taha. Kei te āhua o tō wāhi mahi te whānuitanga o aua haepapa.

E whai ake nei ētahi kōwhiringa hei whakamātau māu hei whakatau i tētahi raru i te wāhi mahi, tae atu ki te whakaweti, ki te whakatīwheta me te whakatoihara.

Mēnā e whakapono atu ana koe ki a ia, ka mutu, kāore te raru i ahu mai i a ia, whakamōhiotia atu tō tumu ki te āhuatanga.

Whakapā atu ki te kaimahi, ki te wāhi rānei o te Pūmanawa Tangata (HR).

Whakapā atu ki tō uniana hei āwhina i a koe. Taunaki ai ngā uniana i ngā kaimahi, ka mutu, ka wātea rātou ki te kuhu atu hei māngai mōu mēnā he mema uniana koe. He pārongo atu anō mō ngā uniana kei te pae tukutuku a Employment New Zealand.

Kōrero atu ki ērā o ō hoa mahi e whakapono atu nā koe. Me whai whakaaro pea koe ki te whakapā atu ā-kāhui ki a HR, ki tētahi tumu, ki tētahi uniana rānei.

Whakapā atu ki tētahi whakahaere tautoko e āwhinatia ai koe: ko Employment New Zealand, ko WorkSafe, ko Youth Law (mēnā e tamariki ake ana koe i te 25), ko Ngā Pou Whakawhirinaki o Aotearoa, ko Community Law rānei.

He kōrero āwhina, he kōrero ārahi hoki mō te whakaweti, mō te whakatīwheta, mō te whakatoihara i te wāhi mahi kei te pae tukutuku a Employment New Zealand.