Kua kōrerohia i tēnei whārangi:

He aha ōku mōtika?

Hei kaimahi i Aotearoa, he mōtika "iti rawa" ōu e kore e taea te tango mai i a koe i te mahi. Ko te pūtake o ēnei he tiaki i a koe kei whakahāwinitia koe i te mahi.

Ahakoa he mea iti rawa ēnei, ka āhei anō koe ki te whakariterite i ētahi anō – engari me mātua whakarite ka whakaurua ērā ki roto i tō kirimana mahi.

Anei ētahi mōtika nui e āhei ana koe:

  • he kirimana mahi ā-tuhi
  • kia kaua e iti ake i te utu mahi iti rawa
  • kia utua ngā whakamatuatanga ā-tau, hararei tūmatanui hoki
  • etahi atu whakamatuatanga, pērā i te whakamatuatanga māuiui
  • ngā whakatā me ngā wā kai.

Kei reira anō ētahi atu mōtika maha mō te nonotitanga, ā, he takahi ture te nonoti i a koe mō ngā mea katoa mai i tō mātāwaka me te ira tangata ki tō taipakeke.


Heoi anō, he rerekē ō mōtika mēnā he kaikirimana, kaitūao, kaimahi rānei koe. He mea nui kia mārama koe ki te momo mahi kei te mahi koe me ngā mōtika e āhei ana koe.

Mō tētahi kōwhiringa pāhekoheko, tirohia te kāwai whakataki a Employment New Zealand mō tēnei take, ‘An Introduction To Your Employment Rights’ i konei:

Ngā hono whaitake:

He aha e tino hira ai te kirimana?

Ko te tūāpapa o tētahi mahi pai ko te kirimana tika. Ko te tikanga kua tukuna tētahi ki a koe i mua i tō tīmata i te mahi, ā, me tīmata anake koe i muri i te whakaaetanga me te waitohu hoki.

He tohu whakatūpato mēnā kaore e tukuna e tō kaituku mahi he kirimana ki a koe, ā, me whakahou haere ina tīmata koe i te mahi.

I raro i te ture, me uru ki te kirimana ngā mōhiohio waiwai maha kia noho ture ai. Arā:

  • te wāhi o tō mahi
  • te momo mahi (tūturu, tētahi atu rānei)
  • ngā tūmahi
  • utu (me ngā huahoko, utu harangotengote, aha atu, aha atu)
  • mēnā he wā whakamātautau
  • me pēhea te whakatau i ngā raruraru.

Ngā hono whaitake:

E hia te rahi o ngā whakamatuatanga ka āhei ahau?

Hei kaimahi, tērā ētahi momo whakamatuatanga rerekē e āhei ana koe ki te whai. Kei roto i ēnei ko ngā hararei tūmatanui, hararei ā-tau, whakamatuatanga māuiui me te tangihanga.

He here ēnei mō ngā momo whakamatuatanga rerekē. Hei tauira, me mahi koe mō te 12 marama me taua kaituku mahi kotahi kia whiwhi ai koe i te katoa o ō whā wiki hararei ā-tau. He mōhiohio kei te hono a Employment New Zealand mō ngā mea e āhei ana koe i raro i te ture.

Ngā hono whaitake:

He aha aku haora me te utu?

Ko te whai utu tētahi o ngā pūtake nui e whai mahi ai te tangata, nō reira ka tika ka whai mōtika koe mō ngā rahinga o tō utu!

Ko te utu iti rawa i Aotearoa i tēnei wā he NZ$21.20 i te haora i mua i te tāke, mai i te 1 o Paengawhāwhā 2022. Mēnā 16 ngā tau, neke atu rānei me mātua whiwhi koe i tēnei utu, engari ia kei te utu tīmata, whakangungu rānei koe - he NZ$16.96 i te haora i mua i te tāke mō ēnei e rua.

I mua i tō waitohu i tētahi kirimana, te tīmata mahi rānei, me mātua whakarite e hia te utu e tika ana ki a koe i raro i te ture kia mōhio ai koe kei te tika te utu i a koe.

Ngā hono whaitake:

Hauora me te haumaru

E pai ai ki a koe tō mahi, he mea nui kia hauora, kia haumaru koe.

Ina, he herenga ō tō kaituku mahi mō tō hauora me tō haumaru. Kei roto i tēnei ko te whakarite:

  • Kei te tika te whakangungu i a koe ki te whakamahi i ngā utauta motuhake.
  • Kei te mōhio koe ki ngā mōrea, pūmate rānei kei roto.
  • Kei te whiwhi koe i ngā utauta, whakangungu hoki hei whakahaere i ngā mōrea me ngā pūmate.
  • Ka whiwhi i ngā whakangungu haere tonu hei whakahaere i ngā mōrea me ngā pūmate.
  • Ka taea e koe te whakaara i ngā māharahara hauora me te haumaru me tō kaituku mahi.

Kei te whai mōtika anō koe ki te whakatā me ngā wā kai. Ko te roa me te maha o ēnei kei te maha o ngā haora e mahi ana koe. Hei tauira, me mātua whai tētahi rā mahi waru haora i ngā whakatā utu 10 meneti e rua me tētahi whakatā wā kai utukore mō te 30 meneti.

Ahakoa he herenga ō tō kaituku mahi, kei runga anō i a koe te kawenga hauora me te haumaru mōu me te hunga i tō taha. Ka rerekē pea tēnei e ai ki te wāhi e mahi ana koe. Hei tauira, he rerekē ngā ture i tētahi toa tēnā i tētahi pēke, ā, kei runga i a koe ki te pānui i tō kirimana me te kōrero ki tō rangatira mēnā kāore i te mārama.

Ngā hono whaitake:

Ka aha mēnā ka pā mai he raruraru?

Mēnā kāore koe i te tino mōhio ki ō mōtika, mēnā rānei ki ō whakaaro kei te tukituki tō kaituku mahi i ō mōtika hei kaimahi, he maha ngā tāngata hei whakapā atu māu kia āwhinatia koe.

Ko te kōrerorero me tō kaituku mahi mō tō take te wāhi pai hei tīmata, engari ki te kore e taea tēnei, kei reira anō ētahi atu huarahi.

Pēnei i ēnei:

Otirā, kore e pai te whakaweti i te mahi, i hea atu rānei. Mēnā ki ōu whakaaro kāore i te pai te tiaki i a koe, me mātua whakaara i tēnei me tō kaituku mahi.

Ki te kore e taea tēnei, ka taea e koe te whakapā atu ki WorkSafe, Employment New Zealand rānei, e whakahaerehia ana e Hikina Whakatutuki, mō ngā āwhina.

Ngā hono whaitake:

Ngā paetukutuku hira

  • Employment New Zealand: Ka taea anō e Employment New Zealand te tuku mōhiohio ki a koe mō ngā mea katoa me mōhio koe mō ō mōtika mahi, kawenga hoki.
  • Te Kāhui Tika Tangata: Ka whakapau kaha Te Kāhui Tika Tangata ki te tiaki i ngā mōtika o ngā tāngata katoa i Aotearoa. Ka tirotirohia e rātau ngā mōtika i te mahi, i ō āhuatanga hoki o ia rā.
  • Worksafe: E tautoko ana a WorkSafe i ngā tāngata katoa kia noho haumaru rātau i roto i te wāhi mahi. He rauemi tino rawe hei āwhina i a koe kia mārama koe ki ō mōtika, ā, me pēhea te whakarite i ngā āhuatanga rerekē, ahakoa tō mahi.
  • Young Workers Resource Centre: Ka āwhina te Young Workers Resource Centre ki te whakaako me te āwhina i te hunga taiohi i roto i te wāhi mahi. He maha ngā awheawhe e whakahaerehia ana e rātau, ā, kikī ana tā rātau rangitaki ki ngā mōhiohio whaitake.
  • Youth Law: He paetukutuku e tuku ana i ngā āwhina ture koreutu puta noa i Aotearoa, me tētahi whārangi whaitake o ō mōtika.
  • Employment Learning Modules

Next in Te whiwhi mahi