Ngā mōtika me ngā haepapa o te noho hoahoa

Ōu mōtika

Hei kairēti mō tētahi papanoho (e rārangi nei ki te kirimana ā-kairēti) he whakamarutanga ā-ture ōu, e kore ai koe e kaiapohia, e takakinohia rānei. Ko ētahi o ō mōtika, ko:

• te tiakanga o te papanoho kia pai te āhua
• te eke o te papanoho ki ngā paerewa hauora, haumaru hoki e tika ana
• te waitohunga o te whakahokinga monihere e kōrua tahi
• te korenga o te kaituku rīhi e wātea i te nuinga o te wā ki te tae poka noa atu ki te papanoho me te kore e whakamōhio atu (atu i ētahi wā tino whaitake)

Ka rerekē pea ēnei, ki te rēti koe i tētahi rūma kotahi, tērā i te wharenoho katoa, ā-kairēti ā-ture mai, ā-hoanoho mai rānei (kāore i rārangi mai ki te kirimana ā-kairēti), te noho rānei ki tētahi wharenoho tukutahi. Torona ētahi kōrero anō mō ō mōtika i te pae tukutuku a Tenancy Services.

He mahi taihara hoki ki te whakatoihara te kaituku rēti i te tangata hauā. Tirohia ētahi atu kōrero mō ngā mōtika tangata hauā mō te wharenoho i te paetukutuku a Community Law.

Ōu haepapa

Arā ētahi haepapa rerekē ka hua ake i te hūnuku ki tētahi whare hou. Kia whakamāramatia ēnei i tō kirimana kairēti, ā, tērā pea he whakatōpūtanga tēnā o ngā kawatau o te hunga e noho kē ana i te whare, o te kaiwhakahaere i te papanoho, o te kaituku rēti rānei. Anei ētahi tauira:

• he utu i te rēti i te wā tika
• he whakapaipai i te whare
• me aha ki te pakaru tētahi mea

He rerekē pea ngā ture mō ngā wharenoho tukutahi, ā, me whai kia whakamāramatia ki a koe i mua i tō kuhu atu.

Ngā kirimana kairēti

“Mō te noho hoahoa, ko taku whakahau kia pānui i te kirimana, me te hoatu hoki ki tētahi atu hei pānui māna, tae atu ana ki ngā āhuatanga moroiti kei raro atu, me te whakarata atu ki tō kairēti whare.”

- Alani

Ko te kirimana kairēti, he tuhinga kua mana i runga i te ture, kua waitohua e kōrua ko te katuku rēti. Ka whai wāhi mai ko ngā kōrero tino whaitake, pēnei i:

• te tauwāhi o te papanoho
• te utu mō te whare, mō āhea hoki utua ai
• te tokomaha e whakaaetia ana kia noho i te papanoho
• te rā tīmata me te rā mutunga o tō noho

Mā te kirimana nei e tohu he aha te momo rētitanga kua whakaaetia e koe. E rua ngā momo kirimana:

1. Ko te rētitanga wātea, kāore ōna rā mōnehu, nō reira ki te hiahia koe ki te puta, me tuku whakamōhio ā-tuhi koe ki tō kaituku rēti i roto i te roa o te wā kua whakaaetia e kōrua.
2. Ko te rētitanga pūmau, e herea ana te roa, arā, ko tētahi tau kotahi pea. Kāore e whakaaetia tō puta i mua atu, ki te kore e mātua oti i a kōrua ko tō kaituku rēti tēnei take te whiriwhiri, ka mutu, he tukanga whakauaua i ōna wā. Me mātua mōhio ka taea e koe ōna herenga i mua i tō whakaae atu.

He whaihua hoki kia puritia tētahi kape o tō kirimana, me ērā atu tuhinga whaitake, pēnei i ngā pūrongo mātai whare, i ngā īmēra hoki, kei tūpono mukua i te ipurangi.

Mehemea kei raro koe i te 18 tau te pakeke, me uaua pea ka whakaae mai te kaituku rēti ki tētahi kirimana rēti. He wā tōna, ka tonoa mā tētahi mātua, kaitiaki rānei e waitohu māu.

Te tautoko manature

Ko te akiaki, kia pai te whanaungatanga i waenganui i a kōrua ko tō kaituku rēti, heoi anō, tērā ētahi wā ka takahē noa.

Ki te pupū he raru i a kōrua ko tō kaituku rēti, kāore nei e taea te whakaea, he āwhina kei Te Ratonga Rētihanga. Mā rātou e tuku kupu āwhina, e titiro ngā tūtohu kaituku rēti i raro i te Residential Tenancies Act 1986, ā, mā rātou e whakarite kaitakawaenga mō waenga i a kōrua ko tō kaituku rēti. Ki te kore tonu e e ai reira, kawea atu tō nawe ki . Heoi anō, me utu mō te haere ki te Taraipiunara, nō reira, he pai ake ki te whakaea i ō take i mua i tō whai i tērā huarahi.

Ki te hiahia kupu āwhina koe, ki te kore rānei koe e āta mōhio mehemea e takahia ana ō mōtika e tō kaituku rēti, whakapā atu ki Youth Law mō ētahi āwhina manature, āwhina utukore.